In agallamh le comhlacht teilifíse Fox News tráthnóna, dúirt Uachtarán Mheiriceá,Donald Trump go bhfuil fórsaí armtha na Stát Aontaithe i ndiaidh Uachtarán Veiniséala,Nicolas Maduro agus a bhean chéile a ghabháil.
Dúirt Donald Trump gur tógadh an bheirt ar bord héalacaptair chuig long cogaidh leis na Stát Aontaithe agus go raibh siad á dtabhairt go Nua Eabhrac.
'Is ansin a chuirfear ar a dtriail iad ar chúiseanna drugaí agus sceimhlitheoireachta' a dúirt sé.
Rithfidh na Stáit Aontaithe cúramaí Veiniséala go n-aistreofar an chumhacht go sábháilte chuig Rialtas nua thall ansin a dúirt an tUachtarán Trump.
Dúirt sé freisin go mbeadh baint mhór ag na Stáit Aontaithe le tionscail na hola i Veiniséala as seo amach.
Tharla sé seo i ndiaidh do na Stáit Aontaithe ionsaithe a dhéanamh thar oíche ar Veiniséala.
Bhí éigeandáil náisiúnta fógraithe ag an Uasal Maduro i ndiaidh na bpléascán a chualathas sa tír thar oíche.
Tuairiscítear go dtáinig an phríomhchathair Caracas faoi ionsaí ón aer i gcaitheamh na hoíche.
Bhí sé geallta roimhe seo ag an Uachtarán Trump go gcuirfeadh sé trúpaí Meiriceánacha isteach i Veiniséala in iarracht brú a chur ar an Uasal Maduro éirí as oifig.
Níl aon aitheantas tugtha ag Meiriceá ná cuid mhaith tíortha eile do réamas uachtaránachta Nicolas Maduro, ag maíomh gur tré chaimiléireacht a bhuaigh sé an toghchán deiridh sa tír.