Tá sé ráite ag an Aire Stáit Niamh Smyth go bhfuil dlíthe na hÉireann agus an Aontais Eorpaigh araon sáraithe ag na daoine atá freagrach as íomhánna ar líne de mhí-úsáid leanaí atá cruthaithe ag Intleacht Shaorga.
Tá íomhánna mar iad á gcruthú ag aip faoi leith de chuid an bhota comhrá Grok, ar leis an meán sóisialta X é.
Is ar Niamh Smyth atá an cúram mar Aire Stáit maidir le hIntleacht Shaorga in Éirinn.
Tá cruinniú iarrtha aici ar X, a dúirt sí, le súil an scéal a phlé agus deireadh a chur leis an gcleachtas.
Is cuma cé acu fíoríomhánna nó íomhánna ríomhchruthaithe atá i gceist, arsa sí, is cion coiriúil é iad a dháileadh ar ardáin ar líne.
Ag labhairt di ar RTÉ inniu, dúirt Niamh Smyth go bhfuil sí cinnte go bhfuil Coimisiún na Meán ag comhlíonadh a ndualgais agus go bhfuil siad ag obair leis an gCoimisiún Eorpach, agus le Grok chomh maith, d'fhonn an fhadhb a réiteach.
Thug sí le fios go mbeadh cruinniú aici leis an Taoiseach Micheál Martin as seo go ceann cúpla lá leis an scéal a phlé.
Dúirt an Taoiseach inné gur chuir an scéal alltacht air.
Nuacht agus Cúrsaí Reatha RTÉ