Séamus Culleton, an t-imirceach as Éirinn atá faoi choinneáil sna Stáit Aontaithe agus a bhfuil a chás i mbéal an phobail, tá sé tagtha chun solais ina thaobh go raibh sé le teacht os comhair cúirte sa tír seo thart ar an am a chuaigh sé anonn in 2009.
Bhí Séamus Culleton cúisithe sa tír seo i ndrugaí a bheith ina sheilbh aige sa Ghleann Mór i gCo Chill Chainnigh, a áit dhúchais, i mí na Bealtaine 2008 agus rún aige iad a dhíol agus a sholáthar.
Eisíodh barántas binse ina leith nuair nár tháinig sé i láthair Chúirt Dúiche Ros Mhic Thriúin i gCo Loch Garman i mí Aibreáin 2009, mí tar éis dó dul go Meiriceá. Thart ar 21 bliain d'aois a bhí sé ag an am.
Tá an Codlatánach i ngéibheann in ionad coinneála inimirce in El Paso, Texas, ó ghabh gníomhairí inimirce é i mBostún, a áit chónaithe, sé mhí ó shin.
Dar lena dhlíodóir thall, bhí fear Chill Chainnigh ar tí cead oifigiúil a fháil cónaí go buan sna Stáit Aontaithe nuair a gabhadh é agus bhí ceadúnas oibre aige cheana féin.
Dúirt an dlíodóir freisin nach raibh a fhios aici dada faoin mbarántas binse roimhe seo agus mhaígh sí nach mbeadh a fhios ag a cliant dada faoi ach an oiread mar go raibh sé i Meiriceá nuair a eisíodh é.
Ar aon chuma, arsa sí, ní hionann barántas agus ciontú.
Nuacht agus Cúrsaí Reatha RTÉ