Tá an Teach Bán ag séanadh tráthnóna go bhfuil Meiriceá ag breithniú airm núicléacha a chaitheamh leis an Iaráin agus bagairtí nua déanta ag an Uachtarán Trump.
B'éigean don Réimeas i Washington an "soiléiriú" sin a dhéanamh tar éis don LeasUachtarán JD Vance labhairt agus é ar cuairt ar Viktor Orban san Ungáir faoi "uirlisí a bheith ag na Fórsaí Armtha nár bhain muid leas astu fós".
Fiú agus an Wall Street Journal ag tuairiscí go bhfuil deireadh curtha ag an Rialtas i Tehran le haon idirbheartaíocht le Washington - rud atá séanta le cúpla nóiméad anuas ag nuachtán an Rialtais an Times of Tehran - tá Trump ag cur fainic ar an Iaráin margadh a dhéanamh "nó curfar sibhialtacht iomlán chun báis anocht.
"Ní hé sin atá uaim ach is dóigh gurbh é atá romhainn.
Gheobhaidh muid amach anocht é".
Tá an tUachtarán ag rá le cupla lá anuas gurbh é an haon a chlog anocht (am na hÉireann) an sprioc le theacht ar shocrú nó titfidh ollscrios ar an Iaráin, ar a cuid stáisiúin ginte leictreachais, droichid agus bonneagar eile, agus go ndéanfar "clochaoisiú" ar an tír.
Coir cogaidh a bheadh ina leithéid a deir saineolaithe ar an dlí idirnáisiúnta.
Tá foinse i Rialtas Tehran tar éis a thabhairt le fios do Reuters "go dtitfidh dorchadas ar fud an réigiúin ar fad agus ar an Araib Shádach go sonrach leis na hionsaithe díoltais" a dhéanfaidh an Iaráin sa gcás is go dtéann Trump chun cinn.
Fágfar na Stáit Aontaithe agus a cuid comhghuaillithe "gan ola ar feadh na mblianta" a deir sé.
Is eol do Washington an méid sin a deir an foinse agus an scéala sin curtha chucu ag Catar.
Ní osclófar Caolas Hormuz a deir sé "ar gheallúintí gan brí" agus más gá dúnfar Caolas Bab El-Mandeb chomh maith a deir sé, ag tagairt do chumas na Houthi san Éimin.
Ar ball beag d'fhógair PríomhAire Iosrael Benjamin Netanyahu go bhfuil an tír sin tar éis ionsaithe buamála a dhéanamh inniu ar iarnróid agus ar dhroichid "a bhíonn á n-úsáid ag Garda na Réabhlóide (sárfhórsaí Arm na hIaráine)" agus gur scrios siad eitleáin iompair agus "na scórtha ingearán" ag bunáit de chuid Aerfhórsa na hIaráine.
Idir an dá linn thug Rialtas na Liobáine le fios tráthnóna go bhfuil 1,530 duine maraithe ag Arm Iosrael i mBeirut agus i ndeisceart na Liobáine le mí anuas - 102 bean agus 130 gasúr ina measc, chomh maith le 57 oibrí sláinte - agus go bhfuil 4,800 gortaithe.
Deir an tArm go bhfuil siad tar éis "seilbh a ghlacadh ar limistéar 5-9 km ó thuaidh den teorainn" ach is beag gabháil chun cinn déanta ag Iosrael tuairiscítear san áit agus é ag cinnt orthu an lámh i n-uachtar a fháil ar Hezbullah.