Déanadh dochar de 738 othar in eachtraí cógais i seirbhísí de chuid na Feidhmeannachta Sláinte (an HSE) anuraidh.
Dochar "beag" nó "measartha" a bhí i gceist i 732 cás ach bhí seisear othar a d'fhulaing "dochar as cuimse".
Sa n-iomlán cláraíodh beagnach 10,500 eachtra cógais, nó eachtra neas-timpiste.
Chuaigh 7,150 cás chomh fada le othar, ach gan dochar nó dochar nár bhfiú trácht air a dhéanamh.
Bhain 2,540 cás le neas-timpiste, gan a ghabháil chomh fada le othar.
Eachtra a d'fhéadfaí a sheachaint é eachtra cógais ina bhfeádfaí dochar a dhéanamh d'othar de bharr chógais atá faoi smacht oibrí gairmiúil cúram sláinte.
Fritheadh na figiúirí mar thoradh ar Cheist Dála a chuir Peadar Tóibín, TD.
Léiríonn sonraí ón nGníomhaireacht um Éilimh ar an Stát gur dáileog cógais a raibh moill á tabhairt nó nár tugadh in aon chor an eachtra cógais is minicí atá cláraithe.
Meastar go mbíonn an tseirbhís sláinte phoiblí ag plé le 2 mhilliún cás ospidéil sa mbliain agus beagnach 2 mhilliún cás i rannóga éigeandála ospidéil.
Deir an HSE go bhfuil Straitéis Sábháilteachta Othar á fheidhmiú acu agus go bhfuil laghdú ar an dochar a dhéantar de bharr eachtraí cógais ar cheann de na haidhmeanna atá leis, go háitiúil, go réigiúnda agus go náisiúnta.
Bíonn an tÚdarás um Fhaisnéis agus Cáilíocht Sláinte (HIQA) i mbun cigireachta go rialta sna hospidéil a deir siad.
Táthar freisin a deir siad tar éis príomhtháscaire feidhmíochta a chur sa tsiúl i mbliana ag díriú go sonrach ar othair os cionn 65 bliain d'aois atá ag tógáil 10 gcógas nó níos mó go leanúnach, ag coinneáil súil ar aon ardú mí-chuí ar aon chógas a dhéanfadh dochar.