Sa Chúirt Choiriúil Speisialta, cuireadh siar faoi choinneáil an athuair ceathrar fear atá cúisithe in ionsaí ar mhosc i nGaillimh a bheartú.
Sin iad Darren Gorman, 34 bliain, as Port Laoise i gCo Laoise; Charles Flynn, 35 bliain, as Caisleán Uí Chonaill i gCo Luimnigh; Garrett Pollock, 35 bliain as Áth na Long, i gCo an Dúin; agus Karolis Peckauskas, 38 bliain, as Droichead Átha i gCo Lú.
Tá an ceathrar fear cúisithe in iarracht a dhéanamh tabhairt faoi ghníomhaíocht sceimhlitheoireachta.
Tá Karolis Peckauskas agus Garrett Pollock cúisithe freisin in airm agus ábhar pléascach a bheith ina seilbh acu.
Tugadh an ceathrar os comhair na cúirte inniu le súil dáta tosaigh na trialach a shocrú.
Dúradh sa chúirt go mb'fhéidir go ndéanfaí dul chun cinn i dtaca leis sin de i gcás beirt den cheathrar agus cuireadh siar faoi choinneáil iad ar fad go dtí an 8 Meitheamh.
Nuacht agus Cúrsaí Reatha RTÉ