Tá fiosrúchán coiriúil ar bun ag Gardaí i gContae Chiarraí maidir le bás fir i dTrá Lí go moch ar maidin.
Gortaíodh duine eile san eachtra a tharla ag Ionad Lóistín d'Iarratasóirí Tearmainn (IPAS) timpeall ar a 5 a.m.
Thart ar 5.20 a cuireadh seirbhísí éigeandala ar an eolas maidir le heachtra thromchúiseach ag sean-bheairicí Bhaile an Mhuilinn.
Ó 2024 tá lóistín á chur ar fáil d'iarratasoiri idirnáisiúnta ar thearmann san iarbheairic airm seo, áit ann do suas le 50 fear singil ar fad.
Nuair a shroich gardaí an láthair tháinig siad ar fhear amháin gortaithe go dona.
Creidtear gurbh amhlaidh a sádh é.
Bhásaigh an fear sin go gairid ina dhiaidh sin de bharr a chuid gortaithe.
Thángthas ar an dara fear freisin ag an ionad.
Bhí seisean, fear sna daicheadaí gortaithe freisin, cé nach raibh a chás chomh tromchúiseach leis an gcéad fhear.
Tugadh eisean chuig Ospidéal Ollscoil Chiarrai i dTrá Lí ach deirtear nach bhfuil sé in aon bhaol báis.
Gabhadh fear eile, idir 45-50 bliain ar an láthair.
Tugadh eisean chuig stáisiun gardaí sa chontae, tá sé á cheistiú faoi Alt 4 den Acht um Cheartas Coiriúil.
Is feidir é a cheistiú ar feadh 4 huaire fichid.
Tá na gardai cruógach ag lathair an ionsaithe ó mhaidin , scrúdaithe dlíeolaíocha agus teicniúla ar bun acu agus iad ag iarraidh ar fhinnéithe teacht chun cinn freisin.
Tá oifigeach sinsearach ceaptha acu freisin le dul i mbun an fhiosrúcháin.
Tá Paiteolaí an Stáit le scrúdú iarbháis a chur ar an gcorp níos deireanaí.