Folúntais
Ceannaire Nuachta agus Cúrsaí Reatha
Conradh Buan Lánaimseartha
Is mian le TG4 Ceannaire Nuachta agus Cúrsaí Reatha a earcú a bheidh i gceannas ar fheidhm iriseoireachta TG4 a fhorbairt, a phleanáil, a stiúradh agus a chomhordú, coimisiúnú ar chúrsaí reatha agus tús a chur le seirbhís dhigiteach nuachta do TG4. Beidh an té a cheapfar ag freagairt don Ard-Stiúrthóir.
Is craoltóir náisiúnta teilifíse Gaeilge é TG4 atá lonnaithe i mBaile na hAbhann, Co. na Gaillimhe. Is craoltóir-foilsitheoir seirbhíse poiblí é TG4 a fhaigheann formhór a ábhair ó earnáil na léiritheoirí neamhspleácha, ábhar a bhfuil duaiseanna agus gradaim go leor buaite aige. Tá ábhar TG4 ar fáil ar gach ardán teilifíse ar fud na hÉireann, ar fud an domhain ar an idirlíon agus ar ardáin dhigiteacha. Faoi láthair tá TG4 ag earcú Ceannaire Nuachta agus Cúrsaí Reatha a bheidh lonnaithe sa Cheanncheathrú i mBaile na hAbhann.
Is í an Ghaeilge teanga oibre TG4 agus mar sin is riachtanas é go mbeadh Gaeilge den scoth ag an té a cheapfar, idir labhairt agus scríobh na teanga. Is fostóir comhdheiseanna é TG4 agus déanfar iarratais incháilithe a mheas beag beann ar inscne, gnéaschlaonadh, aois, taithí shóisialta, cine agus eitneacht, éagumas, stádas sibhialta an teaghlaigh, creideamh nó ar duine den Lucht Siúil atá i gceist. Tá TG4 i bhfabhar na héagsúlachta. Fáilteoidh muid roimh iarratais ó dhaoine ó chúlraí éagsúla.
Beidh an post lonnaithe i gceannáras TG4 i mBaile na hAbhann, Conamara. Tá polasaí oibre solúbtha ag TG4.
Beidh an té a cheapfar freagrach as an obair seo a leanas maille le cúraimí eile:
- Straitéis iomlán Nuachta agus Cúrsaí Reatha TG4 a chur i gcrích agus a threorú, ag teacht le straitéis TG4.
- Fís eagarthóireachta do nuacht agus cúrsaí reatha TG4 a chur i gcrích sa réimse dhigiteach ilardán
- Ceannaireacht a ghlacadh agus stiúradh a dhéanamh ar sheirbhís nua dhigiteach nuachta
- Branda, Tón agus Glór Nuacht TG4 a láidriú agus a chur i mbéal an phobail.
- Aon bhall foirne a bheidh fostaithe ag TG4 mar chuid den straitéis nuachta agus cúrsaí reatha a bhainistiú.
- Plean oiliúna a fhorbairt don iriseoireacht ilardán
- Feidhmiú mar Eagarthóir Coimisiúnaithe ar shraitheanna nuachta agus cúrsaí reatha ón earnáil neamhspleách léiriúcháin
- Treoir eagarthóireachta a thabhairt maidir le hábhar nuachta agus cúrsaí reatha a chraoltar ar aon ardán de chuid TG4.
- An comhaontú reatha le RTÉ, maidir leis an soláthar nuachta agus cúrsaí reatha a chuireann RTÉ ar fáil faoi Acht Craolacháin 2009, a bhainistiú.
- Deiseanna comhpháirtíochta agus comhoibrithe a lorg agus a fhorbairt le meáin iriseoireachta eile in Éirinn agus thar lear.
- Cultúr Nuachta agus Cúrsaí Reatha TG4 a thabhairt chun cinn a bheidh bunaithe ar chroíluachanna TG4 – An Ghaeilge, Cruthaitheacht agus Nuálaíocht, Comhoibriú agus Obair Foirne, Solúbthacht, Ionracas agus Freagracht agus Seirbhís ar ardchaighdeán a chur ar fáil don lucht féachana.
- A chinntiú go bhfuil cumarsáid mhaith idir baill foirne agus go bhfuil eolas á roinnt go héifeachtach i measc d’fhoirne féin agus le comhbhainisteoirí agus comhghleacaithe.
Nithe atá riachtanach don phost seo: Ní foláir duit:
- Cur chuige straitéiseach a bheith agat i do chuid smaointeoireachta.
- Céim san iriseoireacht, sa chumarsáid, nó a gcomhionann a bheith agat.
- Taithí mhór eagarthóireachta a bheith agat ar nuacht nó cúrsaí reatha sna meáin chraolta nó ar mheán cumarsáide eile.
- Taithí chruthaithe a bheith agat ag plé le hiriseoirí.
- Sárthuiscint agus taithí an-mhaith a bheith agat ar ardáin dhigiteacha.
- Taithí chruthaithe a bheith agat ar bheith ag bainistiú foirne, ag déanamh idirbheartaíochta agus ag plé le páirtithe leasmhara eile.
Éireoidh leat sa ról seo más duine tú atá ábalta oibriú go muiníneach, go solúbtha agus go héifeachtach as do stuaim féin i dtimpeallacht spreagúil.
Seol litir iarratais chomh maith le cáipéis (1-2 leathanach) ina léirítear an uaillmhian atá agat do sheirbhísí nuachta TG4 agus don ról mar Cheannaire Nuachta agus Cúrsaí Reatha TG4 chuig cv@tg4.ie nó chuig Oifig an Ard-Stiúrthóra, TG4, Baile na hAbhann, Co. na Gaillimhe, H91 X4T0, roimh 4pm Dé hAoine an 5 Nollaig 2025.
Eolas Breise don Iarratasóir
Grád an Phoist: Grád 2
Uaireanta Oibre:
39 uair sa tseachtain. Táthar ag súil, mar gheall ar riachtanais an phoist, go mbeifeá solúbtha ó am go ham, i.e. go mbeifeá sásta, scaití, oibriú lasmuigh d’uaireanta oifige, ag an deireadh seachtaine agus ar laethanta saoire bainc.
Laethanta Saoire:
Chomh maith leis na laethanta saoire bainc reachtúla, beidh tú i dteideal 23 lá de shaoire íoctha in aghaidh na bliana.
Pinsean:
Tá baill foirne TG4 i dteideal dul isteach i nGrúpscéim Pinsin TG4 faoi réir théarmaí aon scéime atá ann cheana.
Taisteal: Beidh taisteal i gceist ó am go chéile mar chuid den ról, in Éirinn agus thar lear.
Buntáistí eile a bhaineann le bheith ag obair i TG4:
| · Deiseanna Oiliúna agus Forbartha
· Saoire Staidéir agus Scrúduithe · Pinsean Ranníocach · An Clár Cúnaimh d’Fhostaithe · An Scéim um Rothaíocht chun na hOibre |
Láithreoir Aimsire / Leanúnachais & Meán Sóisialta le TG4
Conradh Painéil
Is mian le TG4 Láithreoir Aimsire/Leanúnachais agus Meán Sóisialta a earcú. Is obair pháirtaimseartha ar chonradh phainéil a bheidh i gceist agus beidh an té seo lonnaithe sa Cheannáras i mBaile na hAbhann i nGaeltacht na Gaillimhe. Freagróidh an Láithreoir Aimsire/Leanúnachais don Stiúrthóir Lucht Féachana, Margaíochta agus Comhpháirtíochta. Beidh ról lárnach ag an té a cheapfar ag cur sceideal TG4 i láthair an phobail féachana, ar an teilifís agus ar na meáin shóisialta.
Fostóir comhionannais deiseanna é TG4 agus déantar iarratais cháilithe a mheas beag beann ar inscne, gnéaschlaonadh, aois, taithí shóisialta, cine agus eitneacht, éagumas, stádas sibhialta an teaghlaigh, creideamh ná ballraíocht den Lucht Siúil. Tá meon dearfach ag TG4 i ndáil le hÉagsúlacht. Fáilteoidh muid roimh iarratais ó dhaoine a bhfuil cúlraí éagsúla acu.
An Ról
Beidh an té a cheapfar ag feidhmiú mar Láithreoir Leanúnachais & Aimsire le TG4 agus ar na Meáin Shóisialta. Beidh an té seo freagrach as na nithe seo a leanas:
- Faisnéis aimsire, ábhar clár agus leanúnachas a chur i láthair ar TG4
- Cumarsáid a dhéanamh leis an Lucht Féachana trí Ghuthú, ar na Meáin Shóisialta & srl.
- Cur le branda TG4 trí Ghlór agus Aitheantas a thabhairt don chainéal, ar an aer, ar líne agus i measc an phobail.
- An lucht féachana a threorú chuig ábhar TG4.
- Ionadaíocht a dhéanamh do TG4 ag ócáidí pobail agus poiblí.
Nithe atá riachtanach don phost seo:
Ní mór cumas láithreoireachta, teacht i láthair taitneamhach, urlabhra shoiléir agus ardchumas sa scríobh agus sa chumarsáid a bheith ag an té a cheapfar don phost seo.
- Is í an Ghaeilge teanga oibre TG4 agus mar sin tá sé riachtanach go mbeadh Gaeilge den scoth ag an té a cheapfar, idir labhairt agus scríobh na teanga.
- Fócas dearfach agus cumas maith foirne
- Sár-thuiscint ar chumas na meán sóisialta agus na n-ardán digiteach lucht féachana a aimsiú.
- Taithí ar ábhar físe / fuaime a chruthú do na hardáin shóisialta.
- Tuiscint ar an bpobal féachana atá ag TG4
- Taithí mhaith ar chúrsaí riaracháin agus ríomhaireachta (ard-tuiscint ar Excel, MS Office agus ábalta córais nua a fhoghlaim go tapa).
- Taithí mhaith ar thaighde a dhéanamh
- A bheith ábalta feidhmiú go muiníneach agus go héifeachtach as do stuaim féin i dtimpeallacht spreagúil.
Is i gCeannáras TG4 a bheidh an post seo.
4pm Dé hAoine an 16 Eanáir 2026 an dáta deiridh a nglacfar le hiarratais. Seol mír físe 1’00” ar fhad ag cur síos ort fhéin, mar aon le do CV chuig cv@tg4.ie.