Cúrsa Oiliúna san Iriseoireacht á reáchtáil ag TG4 i gcomhar le Gréasán na Meán Skillnet & Údarás na Gaeltachta
01.04.26
Cúrsa Oiliúna san Iriseoireacht á reáchtáil ag TG4 i gcomhar le Gréasán na Meán Skillnet & Údarás na Gaeltachta
Tá cúrsa iriseoireachta á chur ar fáil arís i mbliana ag TG4 i gcomhar le Gréasán na Meán Skillnet & Údarás na Gaeltachta.
Beidh béim ar oiliúint phraiticiúil iriseoireachta ilmheáin a chur ar fáil i rith an chúrsa, a bheidh ar siúl ar feadh coicíse ón 18 – 29 Bealtaine.
Tá an cúrsa seo dírithe ar iriseoirí nua-cháilithe nó atá ag tosú amach ina ngairm.
I gCampas Íosagáin i mBaile Bhuirne a reáchtálfar an chéad seachtain agus beidh an dara seachtain ar siúl sa Spidéal i gConamara. Beidh áit do chúigear déag ar an gcúrsa.
Cuirfear oiliúint ar rannpháirtithe an chúrsa iriseoireachta chun tuairisc nuachta a chur le chéile do na meáin ar líne agus don teilifís. Foghlaimeoidh siad faoin gcaoi le scéalta láidre a bhailiú, a fhiosrú agus a scríobh don ré ilardáin ilmheáin ina bhfuilimid.
Cuirfear oiliúint orthu freisin i dtaobh taighde a dhéanamh, foinsí a dheimhniú agus ar dhlí na meán. Chomh maith leis sin, cuirfear oiliúint orthu i gcruinnscríobh na Gaeilge, scripteanna agus ailt nuachta a scríobh don idirlíon agus an chaoi leis an nuacht a léiriú do na meáin shóisialta.
Foghlaimeoidh siad na bunscileanna ar an gcúrsa seo atá de dhíth ar gach iriseoir chun go mbeidh siad ábalta oibriú i seomra nuachta an lae inniu.
Is í Grett O’Connor, a chaith fiche bliain ina hIriseoir Teilifíse le Nuacht TG4, Stiúrthóir an chúrsa. Cháiligh Grett ina cóitseálaí feidhmeannach in 2018, tráth ar fhág sí RTÉ chun a comhlacht féin ‘My Media’ a bhunú. Tá sí ag obair ó shin i leith san earnáil cumarsáide – ag léiriú físeán, ag cur oiliúint ar lucht na meán, ag léachtóireacht go páirtaimseartha agus bíonn sí ina bean an tí ó am go chéile ag comhdhálacha agus ócáidí poiblí eile.
Is í Bainisteoir Cláir & Oiliúna Champas Íosagáin i nGaeltacht Mhúscraí chomh maith.
Lena suim a léiriú sa chúrsa, ní mór d’Iarrthóirí:
A bheith os cionn 18 mbliana d’aois.
A bheith ina gcainteoirí líofa Gaeilge.
An-spéis a bheith acu sa chumarsáid, i gcúrsaí nuachta agus sna meáin.
A bheith fiosrach, dúthrachtach agus féinspreagtha agus sásta iad féin a dhíriú go hiomlán ar chlár oiliúna dian.
Gan bheith in oideachas lánaimseartha.
Clúdófar costais an chúrsa, mar aon le lóistín agus lón, do rannpháirtithe an chúrsa.
Níl ort ach físeán gearr a thaifeadadh díot féin ina míníonn tú an chúis ar mhaith leat freastal ar an gcúrsa iriseoireachta seo.
