Preas

TG4 chun ‘Sár-Satharn’ agus ‘Sár-Domhnach’ i mBabhta Ceannais Shraitheanna Allianz a Chraoladh

20.03.26

Beidh scoth na gcluichí beo CLG le feiceáil ar TG4 an deireadh seachtaine seo agus 11 chluiche ó Shraitheanna Allianz á gcraoladh ar chainéal teilifíse TG4, ar Sheinnteoir TG4 agus ar chainéal YouTube Spórt TG4.
 
Taispeánfar formáid ‘Sár-Domhnach’ GAA Beo a bhfuil an-tóir air anuas ar ‘Sár-Satharn’ i Sraith Iomána Allianz den chéad uair, chun deireadh seachtaine mór den chraoladh a chur ar fáil sa dá chód.
 
Is í seo an tríú bliain a bhfuiltear ag craoladh ‘Sár-Domhnach’ ar clár é nach mbeidh lucht féachana CLG ag iarraidh a chailleadh agus ina gcuirtear craoladh beo ag an am céanna ar fáil ar Roinn 1 agus ar Roinn 2 i Sraith Peile Allianz. Cinnteofar le clúdach níos leithne na bliana seo nach gcaillfear oiread is nóiméad den aicsean, mar go mbeidh cluichí á dtaispeáint beo ar iliomad ardán.
 
Le linn an dá lá, beidh clúdach scáileáin roinnte, preabghrafaicí de scórtha beo agus an t-eolas is déanaí i bhfíor-am ar thábla na sraithe san áireamh i bhformáid craolacháin nuálach TG4. Cinnteoidh sin go mbeidh gach eolas ag an lucht féachana faoin méid atá ag tarlú i dtaobh na bhfoirne a bheidh ag fáil ardú céime agus i dtaobh na bhfoirne atá ag troid chun ísliú céime a sheachaint. Is léir go bhfuil ag éirí thar cionn leis an bhformáid dhinimiciúil seo i measc an lucht féachana, agus táthar á cur i gcomparáid le clúdach “RedZone” mór le rá an NFL.
 

SÁR-SATHARN – SRAITH IOMÁNA ALLIANZ

Cuirtear tús breá leis an deireadh seachtaine tráthnóna Dé Sathairn le scoth na hiomána:

• Cuirfidh an cluiche idir Luimneach agus Gaillimh tús le craoladh beo TG4 ar chainéal teilifíse TG4 agus beidh an t-eolas is déanaí á chur ar fáil beo as gach cluiche eile i Roinn 1A.
• Sruthófar Corcaigh v Uíbh Fhailí agus Tiobraid Árann v Cill Chainnigh beo ag an am céanna ar YouTube Spórt TG4.

SÁR-DOMHNACH – SRAITH PEILE ALLIANZ

Cuirfear tús le hollchraoladh peile an Domhnaigh ag 12:30pm:

Roinn 2

• Cill Dara v Lú – Beo ar TG4 – agus cuirfear an t-eolas is déanaí ó gach cluiche eile i Roinn 2 ar fáil beo freisin.
• Doire v an Cabhán, Tír Eoghain v Corcaigh, Uíbh Fhailí v an Mhí – Beo ar chainéal YouTube Spórt TG4.

Roinn 1 (ó 3:00i.n.)

• Gaillimh v Áth Cliath – Beo ar TG4 – agus cuirfear an t-eolas is déanaí ó gach cluiche eile i Roinn 1 ar fáil beo freisin.
• Muineachán v An Dún, Maigh Eo v Ros Comáin – Beo ar chainéal YouTube Spórt TG4.

CLÚDACH BREISE

Beidh cluiche aonair i Roinn 3 idir Loch Garman agus an Iarmhí ar fáil beo ar Sheinnteoir TG4 agus ar an Aip (14:00) chomh maith, agus beidh craoladh iarbheo ar an gcluiche á thaispeáint ar chainéal teilifíse TG4 níos déanaí san oíche.
 

BÍGÍ LINN

Is féidir leis an lucht féachana a bheith ag faire ar chainéal teilifíse TG4, ar chainéal YouTube Spórt TG4 agus ar Sheinnteoir TG4 le haghaidh deireadh seachtaine ollmhór cinniúnach agus lán aicsin i Sraitheanna Allianz.

Lean Spórt TG4 ar na meáin shóisialta don scéal is déanaí, buaicphointí, anailís agus príomhphointí cainte beo le linn deireadh seachtaine iontach de chluichí CLG.