Preas
Comhpháirtíocht Chraolta Nua Dhá Bhliain Comhaontaithe ag Cumann Cispheile na hÉireann agus TG4
Is síneadh é seo ar an gcomhpháirtíocht chraolta fhadbhunaithe atá eatarthu ón mbliain 2014
26.11.25

Tá comhpháirtíocht nua chraolta dhá bhliain aontaithe ag Cumann Cispheile na hÉireann le TG4, ina bhfanfaidh an stáisiún ina chraoltóir oifigiúil ar fhoirne idirnáisiúnta cispheile na bhfear agus na mban in Éirinn. Beidh clúdach beo ag an stáisiún, atá ag craoladh imeachtaí cispheile na hÉireann ó 2014 i leith, ar Chluichí Ceannais Chorn Náisiúnta na bhFear agus na mBan Domino’s i mí Eanáir agus ar Chluichí Ceannais Ard-Sraith na bhFear agus na mBan Domino’s i mí Aibreáin.
Craolfar 14 chluiche beo ar TG4 le linn shéasúr 2025/26. Tá an fógra seo á dhéanamh roimh sheachtain mhór de chluichí idirnáisiúnta nuair a chuirfidh foireann náisiúnta na bhfear tús lena dtréimhse faoi stiúir an phríomh-chóitseálaí nua Michael Bree. Beidh foireann na hÉireann i Lucsamburg Déardaoin dá gcéad chluiche i Réamhbhabhtaí Cáilithe EuroBasket FIBA 2029. Imreoidh siad cluiche ag baile in aghaidh na Macadóine Thuaidh ina dhiaidh sin Dé Domhnaigh sa Láthair Náisiúnta Cispheile.
Dúirt Príomhfheidhmeannach Chumann Cispheile na hÉireann, John Feehan: “Tá ríméad orm a fheiceáil go bhfuil Cumann Cispheile Éireann ag leanúint den chomhpháirtíocht sheanbhunaithe atá aige le TG4 ó 2014 i leith. Tá clúdach den scoth curtha ar fáil acu ar ár bhfoirne idirnáisiúnta Éireannacha ó d’fhilleamar ar EuroBasket FIBA in 2021. Tá leanta againn leis an gcaidreamh sin agus TG4 ag taispeáint cluichí dúshláin an tsamhraidh i mí Iúil seo caite i gcoinne na hIorua mar aon le Corn na hEorpa FIBA 3×3 i mí Mheán Fómhair. Sin sa bhreis ar an gcraoladh seanbhunaithe a dhéanann TG4 ar Chluichí Ceannais an Choirn Náisiúnta gach mí Eanáir, mar aon le clabhsúr an tséasúir ag baile – Cluichí Ceannais Ard-Sraith na bhFear agus na mBan Domino’s. Tá fás agus forbairt ag teacht ar an gcispheil in Éirinn i gcónaí, ó thaobh imeartha agus rannpháirtíochta, agus tá clúdach TG4 lárnach ansin.”
Dúirt Rónán Ó Coisdealbha, Ceannasaí Spóirt TG4: “Tá an borradh atá tagtha faoin spéis atá ag daoine i gcispheil na hÉireann feicthe againn ar fad le roinnt blianta anuas agus tá lúcháir orainn leanúint leis an gcomhpháirtíocht seo don chéad dá shéasúr eile le Cumann Cispheile na hÉireann. Tá roinnt taispeántas den scoth tugtha ag foirne náisiúnta na bhfear agus na mban san Eoraip agus tá buanna móra faighte acu ar an mbealach. Is iad cluichí ceannais an Choirn Náisiúnta fós ceann de na himeachtaí sárthaispeántais i bhféilire spóirt na hÉireann agus cuirimid deireadh leis an séasúr ag baile le ‘Sár-Chluichí an Domhnaigh’, ar a gcraoltar cluichí ceannais Ard-Sraith na bhFear agus na mBan Domino’s. Táimid ag tnúth leis an gcuid is fearr de chispheil na hÉireann a thaispeáint arís.”
Is féidir ticéid do chluiche EuroBasket FIBA na hÉireann leis an Macadóin Thuaidh Dé Domhnaigh a cheannach anseo.
Cluichí Réamhbhabhtaí EuroBasket FIBA 2029
Déardaoin an 27 Samhain, 2025
Lucsamburg v Éire, 18:30, Centre National Sportif & Culturel d’Coque
Dé Domhnaigh an 30 Samhain, 2025
Éire v An Mhacadóin Thuaidh, 17:00, An Láthair Náisiúnta Cispheile
Dé hAoine an 27 Feabhra, 2026
Éire v An Asarbaiseáin, 19:30, An Láthair Náisiúnta Cispheile
Dé Luain an 2 Márta, 2026
Éire v Lucsamburg, 17:00, An Láthair Náisiúnta Cispheile
Déardaoin an 2 Iúil, 2026
An Mhacadóin Thuaidh v Éire, ionad/am le socrú
Dé Domhnaigh an 5 Iúil, 2026
An Asarbaiseáin v Éire, ionad/am le socrú
Babhtaí Cáilithe EuroBasket FIBA 2027 na mBan
Dé Céadaoin an 12 Samhain
Éire v Lucsamburg, 17:00, An Láthair Náisiúnta Cispheile
Dé Sathairn an 15 Samhain
Éire v An Bhoisnia agus an Heirseagaivéin, 19:25, An Láthair Náisiúnta Cispheile
Dé Céadaoin an 11 Márta
Lucsamburg v Éire, ionad/am le socrú
Dé Sathairn an 14 Márta
An Bhoisnia agus an Heirseagaivéin v Éire, ionad/am le socrú
Corn Náisiúnta Domino’s
Corn Náisiúnta MSL Domino’s (Corn Pat Duffy)
Dé Sathairn an 17 Eanáir, 2026
TBC v TBC, 20:00, An Láthair Náisiúnta Cispheile (TG4 ar an aer ag 19:45)
Corn Náisiúnta WSL Domino’s (Corn Paudie O’Connor)
Dé Domhnaigh an 18 Eanáir, 2026
TBC v TBC, 17:30, An Láthair Náisiúnta Cispheile (TG4 ar an aer ag 17:25)
Cluichí Ceannais Ard-Sraitheanna na bhFear agus na mBan
Dé Domhnaigh an 12 Aibreán, 2026
Cluiche Ceannais Ard-Sraith na mBan Domino’s, 14:00, An Láthair Náisiúnta Cispheile (TG4 ar an aer ag 13:45)
Cluiche Ceannais Ard-Sraith na bhFear Domino’s, 16:30, An Láthair Náisiúnta Cispheile
Teagmháil do na Meáin:
Nathaniel Cope | Ceann Cumarsáide, Meán agus Digiteach – Basketball Ireland | ncope@ireland.basketball