Preas
TG4 chun gach céim de Tour de France a chraoladh beo
23.06.25
Tá ríméad ar TG4 a fhógairt go gcraolfaidh sé gach céim de Tour de France 2025 beo, rud a chiallaíonn go mbeidh an t-imeacht rothaíochta is mó agus is cáiliúla ar domhan á chur ar fáil saor go haer do lucht féachana na hÉireann ó thús go deireadh.
Cuirfear tús leis an 112ú eagrán den Tour de France Dé Sathairn an 5 Iúil le lúb 184km a thosóidh agus a chríochnóidh in Lille Métropole, agus cuirfear clabhsúr ar an gcomórtas Dé Domhnaigh an 27 Iúil nuair a thabharfar ar ais an chéim dheireanach mór le rá ar an Champs-Élysées i bPáras, céim nach raibh ann anuraidh de bharr go raibh Cluichí Oilimpeacha 2024 ar siúl.
Is turas ar leith a bheidh i dturas na bliana seo de bharr go mbeidh an comórtas ar fad ar siúl san Fhrainc, rud nach bhfuil tarlaithe ón mbliain 2020. Ar feadh na 21 chéim, tabharfaidh na rothaithe faoi chineálacha éagsúla tír-raonta: 7 gcéim réidh, 6 chéim sna cnoic, 6 chéim sna sléibhte (lena n-áirítear chúig cinn de na céimeanna ag críochnú ar bharr sléibhe), agus 2 thriail ama, le dhá lá sosa ar an mbealach.
Mar chuid de chlúdach cuimsitheach TG4, craolfar gach céim beo ar chainéal líneach TG4, ar Sheinnteoir TG4, agus ar Aip TG4, agus is iad an bheirt a bhfuil an-tóir ag lucht leanúna an Tour orthu, Páidí Ó Lionáird agus Pádraic Ó Cuinn a bheidh i mbun na tráchtaireachta arís i mbliana. Treoróidh an bheirt an lucht féachana trí gach casadh agus lúbadh, trí gach ard agus ráib an peloton agus é ag tabhairt faoi cheantair thuaithe, cathracha, ceantair le cósta agus beanna Alpacha na Fraince
Bíodh tú ag leanúint na rothaíochta ar feadh do shaoil nó ag féachaint ar an gcomórtas den chéad uair, cuirfidh TG4 bealach den scoth agus inrochtana ar fáil duit chun lán na súl a bhaint as an sárimeacht spóirt seo.
Tour de France 2025 – Sceideal na gCraolachán ar TG4:
| Dáta | Céim | Bealach | Ag Tosú | Ag Críochnú | Ardán |
| 05/07 | 1 | Lille Métropole > Lille Métropole | 12:00 | 17:15 | Aip & Seinnteoir TG4 |
| 06/07 | 2 | Lauwin-Planque > Boulogne-sur-Mer | 14:45 | 17:10 | Beo ar TG4 |
| 07/07 | 3 | Valenciennes > Dunkerque | 13:00 | 17:00 | Beo ar TG4 |
| 08/07 | 4 | Amiens Métropole > Rouen | 12:05 | 17:00 | Beo ar TG4 |
| 09/07 | 5 | Caen > Caen (TT) | 12:00 | 17:10 | Beo ar TG4 |
| 10/07 | 6 | Bayeux > Vire Normandie | 13:00 | 16:55 | Beo ar TG4 |
| 11/07 | 7 | Saint-Malo > Mûr-de-Bretagne Guerlédan | 11:00 | 16:30 | Beo ar TG4 |
| 12/07 | 8 | Saint-Méen-le-Grand > Laval Espace Mayenne | 13:00 | 16:45 | Beo ar TG4 |
| 13/07 | 9 | Chinon > Châteauroux | 12:00 | 16:45 | Beo ar TG4 |
| 14/07 | 10 | Ennezat > Le Mont-Dore Puy de Sancy | 12:00 | 17:05 | Beo ar TG4 |
| 15/07 | LÁ SOSA | ||||
| 16/07 | 11 | Toulouse > Toulouse | 12:05 | 16:40 | Beo ar TG4 |
| 17/07 | 12 | Auch > Hautacam | 13:00 | 17:25 | Beo ar TG4 |
| 18/07 | 13 | Loudenvielle > Peyragudes (TT) | 12:00 | 17:00 | Beo ar TG4 |
| 19/07 | 14 | Pau > Luchon-Superbagnères | 11:30 | 17:00 | Beo ar TG4 |
| 20/07 | 15 | Muret > Carcassonne | 12:05 | 16:45 | Beo ar TG4 |
| 21/07 | LÁ SOSA | ||||
| 22/07 | 16 | Montpellier > Mont Ventoux | 11:00 | 16:30 | Beo ar TG4 |
| 23/07 | 17 | Bollène > Valence | 13:00 | 16:50 | Beo ar TG4 |
| 24/07 | 18 | Vif > Courchevel Col de la Loze | 12:00 | 17:05 | Beo ar TG4 |
| 25/07 | 19 | Albertville > La Plagne | 12:15 | 17:00 | Beo ar TG4 |
| 26/07 | 20 | Nantua > Pontarlier | 12:00 | 15:50 | Beo ar TG4 |
| 27/07 | 21 | Mantes-la-Ville > Paris Champs-Élysées | 15:00 | 19:25 | Beo ar TG4 |
Is féidir tuilleadh eolais a fháil faoi Tour de France 2025 ar shuíomh gréasáin oifigiúil an chomórtais ar: www.letour.fr