Skip to main content
< ar ais go TG4.ie

Gradam Ceoil TG4

Diarmuid Ó Meachair – Ceoltóir Óg na Bliana

Athfhriotal

Is as Cúil Aodha, i nGaeltacht Mhúscraí i gCo. Chorcaí an boscadóir cnaipí Diarmuid Ó Meachair. Chomh maith leis an mbosca ceoil BC, C#D agus DC# a sheinm, seinneann sé an mileoidean 10 n-eochair agus is amhránaí ar an sean-nós é freisin. Chuaigh na ceoltóirí Finbarr Dwyer, Jackie Daly, Johnny Connolly agus an boscadóir as Meiriceá John Kimmel i bhfeidhm ar a stíl agus faigheann sé spreagadh freisin as ceol traidisiúnta na ndaoine in Québec. Bhuaigh sé craobh Shinsear na hÉireann ar an mileoidean ag an bhFleadh in Inis nuair a bhí sé 19 bliain d’aois. Tugadh cuireadh dó seinm ag ceolchoirm i gcuimhne Finbarr Dwyer ag Fleadh Cheoil na hÉireann an bhliain ina dhiaidh sin. Tá roinnt comórtais amhránaíochta ar an sean-nós buaite aige ag Oireachtas na Samhna.
Is múinteoir bunscoile é Ó Meachair freisin, chríochnaigh sé a oiliúint múinteoireachta i gColáiste Mhuire gan Smál sa bhliain 2018. Tá sé ag múineadh anois i nGaelscoil Uí Ríordáin i mBaile an Chollaigh, Co. Chorcaí, áit ar threoraigh sé grúpa de 80 leanbh ceithre amhrán ar an sean-nós a chasadh mar chuid den imeacht taibhealaíon do leanaí, Cór Fhéile na Scol – Corcaigh. Sa bhliain 2018, thug sé faoi cheardlann ar an mbosca cnaipí, ceardlann a d’óstáil sé chomh maith, ag Éigse Dhiarmuidín; sa bhliain 2020 sheinn sé leis féin mar chuid de shraith TG4 Tradfest; agus in 2020 agus 2021 mhúin sé ag Scoil Samhraidh Willie Clancy.