Preas

CUMA ÚR NUA AR SPÓRT TG4 AGUS AN CRAOLTÓIR AG CEILIÚRADH 30 BLIAIN AR AN AER

06.10.26

 

 
Tá brandáil nua agus dána nochta ag TG4 do Spórt TG4 mar chuid den cheiliúradh ar chomóradh 30 bliain an chraoltóra.
 
Tá cúrsaí spórt i gcroílár TG4 le tríocha bliain agus cuireann an craoltóir cuid de na cláir is mó a bhfuil tóir agus a bhfuil cion ag an bpobal orthu ar fáil, cláir a bhfuil ceangal láidir cruthaithe acu leis an lucht féachana ar fud na hÉireann.
 

Rannóg Cruthaitheachta TG4 a d’fhorbair branda nua Spórt TG4 go hinmheánach i gcomhar le TheTenthMan. Nochtadh an chuma nua atá ar an mbranda i rith an chláir GAA BEO Dé Domhnaigh, an 4 Deireadh Fómhair, ar clár beo é a bhíonn Nemeton, comhlacht léiriúcháin neamhspleách atá lonnaithe i bPort Láirge, i mbun léirithe air.
 

Léiríonn an dearadh nua an fhorbairt atá tagtha ar Spórt TG4 le 30 bliain, ón gcéad lá nuair nach raibh sé ach á chur ar fáil don lucht féachana teilifíse amháin go dtí an lá atá inniu ann nuair atá sé á chur ar fáil i dtimpeallacht ilmheán don lucht féachana.
 

Cuirfidh an bhrandáil nua cuma níos comhaimseartha agus níos feiceálaí ar an mbranda, agus cuirfidh sí peirspictíocht úr ar fáil maidir leis an gcaoi a gcuireann Spórt TG4 scéalta (tuairimí), fíricí agus paisean don spórt Éireannach i láthair an lucht féachana.
 

Dúirt Rónán Ó Coistealbha, Ceannasaí Spóirt TG4:

“Tá an spórt ina chuid lárnach de chláir TG4 le 30 bliain anuas agus tá ról tábhachtach aige i gcónaí maidir leis an gcaoi a ndéanann muid ceangal leis an lucht féachana ar fud na hÉireann. De bharr go mbíonn nósanna féachana agus na meáin i gcoitinne síoraí ag athrú, is am maith é seo chun athrú a dhéanamh ar bhranda Spórt TG4. Tugann an bhrandáil nua seo léargas ar chomh maith agus atá ár gclúdach spóirt agus ar bhuaine an chlúdaigh sin, ar brandáil í a fhágann go bhfuil Spórt TG4 réidh don todhchaí trí láithreacht shoiléir agus shainiúil a bheith aige ar ardáin teilifíse, dhigiteacha agus shóisialta.”
 

Is cuid de chlár gníomhaíochtaí níos leithne í an bhrandáil nua seo chun ceiliúradh a dhéanamh ar chomóradh 30 bliain TG4 ar an 31 Deireadh Fómhair 2026, agus chun ceiliúradh a dhéanamh ar an gcraoltóir anois agus amach anseo.